Tenor registraziuns dal Servetsch seismologic svizzer sto la bova da crappa esser sa distatgada en la Val Roseg la dumengia damaun. Sco che la pledadra da la Polizia chantunala Anita Senti ha confermà envers RTR sa tractia d’ina gronda bova che saja congualabla cun quella dal Piz Cengalo.
Igl è stà ina gronda fortuna ch'igl è capità la dumengia la damaun baud a las 07:00 cura che paucas persunas eran en viadi. Ed er che la loipa e la via dad ir a spass eran serradas.
La bova saja sa distatgada vi dal Piz Scerscen entadim la Val Roseg, di il president communal da Samedan Gian Peder Niggli. Il volumen da la bova vegn stimà sin passa in milliun meters cubics. Quai correspunda da la bova da Bondo l'onn 2017.
Il material da crappa, glatsch è naiv haja tratg fastizs sur ina lunghezza da var tschintg kilometers. La bova è sa fermada var 1,5 kilometers davant l’Hotel Roseg. Alpinists ch’eran en viadi per ir sin il Piz Bernina hajan annunzià la crudada da crappa.
Ins n'haja betg fatg quint cun ina bova cun grippa, naiv e glatsch, di Martin Kaiser da l'Uffizi da guaud e privels da la natira. Ed oravant tut ina bova talmain gronda, quai saja stà in eveniment nunspetgà.
Quest lieu n'è betg stà sut observaziun pli exacta. Uss stuains examinar la bova e guardar tge consequenzas che quella porta.
Entant saja vegnì sgulà sur tut il territori, senza avair chattà fastizs da persunas. Era na sajan naginas persunas vegnidas annunziadas sparidas.
