Actualmain è Thomas Schadegg en la suprastanza da la vischnanca da la Val Müstair e responsabel per il departament da planisaziun, construcziun ed infrastructura. Tar las proximas elecziuns vul el dentant daventar president da la vischnanca. Schadegg è interprendider en la branscha da construcziun e maina cun sia dunna in hotel. Commember d'ina partida n'è el betg.
Sia candidatura sco president ha el annunzià ensemen cun dus umens che vulan ir en suprastanza: Chasper Stuppan (fin qua) da Tschierv e Roman Federspiel (nov) da Müstair.
![Drei Männer posieren für ein Gruppenbild. Alle wollen in den Gemeinderat von Val Müstair.](https://www.rtr.ch/static/cms/images/960w/1d65716.jpg)
Las elecziuns han lieu ils 22 da settember. Schadegg è fin uss l'emprima persuna ch'ha annunzià ina candidatura. La presidenta actuala da la Val Müstair è Gabriela Binkert Becchetti. Sin las proximas elecziuns vegn la suprastanza er reducida d'actualmain set sin tschintg persunas.