L'interess è stà grond per la radunanza communala en Val Müstair. 176 abitantas ed abitants èn sa radunads en la chasa da scola Sta. Maria. L’interess ha valì oravant tut a la tractanda per in credit da 6.9 milliuns francs per la sanaziun da la chasa da scola a Müstair.
Gea a 6.9 milliuns per la sanaziun da la scola Müstair
Cun la sanaziun da la scola existenta a Müstair prevesan ins da simplifitgar il manaschi da scola, reducir ils custs per il transport dals uffants, e da dar avunda spazi per realisar differents locals. A Müstair datti en vischinanza plinavant ina plazza da sport. Quai ils arguments da la presidenta Gabriella Binkert-Bechetti per ina sanaziun da la scola a Müstair. La radunanza communala è suandada cleramain la proposta da sia presidenta cun 134 gea e 40 na (1 vusch betg valida, 1 abstenziun).
Ils 6.9 milliuns per la sanaziun da la scola èn tenor la presidenta Gabriella Binkert-Bechetti in aut import per purtar sez. La vischnanca da Val Müstair ha in pe d’impostas da 120%, tenor la presidenta na vegn in augment da la taglia betg en dumonda.
Ella prevesa perquai da dumandar daners organisaziuns ed instituziuns che sustegnan tals projects ed uschia empruvar da recaltgar enfin trais milliuns francs. Las tractativas cun questas organisaziuns n’han betg anc cumenzà.
Jau vegn ad esser optimistica che nus vegnin da ramassar ina part da las finanzas per la sanaziun da la scola.
En cas che la vischnanca na vegn betg da ramassar raps dad instituziuns externas prevesan ins da dumandar la banca in credit. Tenor Gabriella Binkert-Bechetti ha la vischnanca oz radund quatter milliuns francs debits, a lunga vista fissi pussaivel da purtar era in pitschen augment dal debit.
Era ils 12.3 milliuns per il PEM èn approvads - unanimamain
La radunanza communala ha consentì unanimamain il credit per renovar ils dus implants electrics «Muranzina» e «Chasseras». La finanziaziun capita directamain sur la gestiun da la Provediment Electric Val Müstair (PEM). Per la vischnanca na datti nagins custs.
Dapli paja per presidenta, suprastanza e pumpiers
Dapi la fusiun dal 2009 n'è il reglament da salarisaziun betg vegnì midà. Las adattaziuns relevantas che la radunanza communala ha approvà cleramain (125 gea, 14 na, rest abstenziuns) è l'augment da la paja da la presidenta communala da 50’000.00 sin nov 70’000.00 francs per onn (+40%). E las persunas en suprastanza retschaivan 7’500.00 empè da fr. 5’000 francs per onn (+50%). Plinavant è vegnida adattada la salarisaziun dal corp da pumpiers. La radunanza consenta ils augments.