Tir sin columbas – quai è in sport cun differentas disziplinas. Intginas dad ellas èn olimpicas, il parcours da chatscha betg. Ed il champiunadi svizzer da precis quel ha gì lieu la fin d'emna da Tschuncaisma a Zernez. Durant dus dis èn las tschintg tregantas ed ils radund 60 tregants da tranter 12 ed 81 onns sa mesirads.
Tar il parcours da chatscha datti tschintg posts nua che las columbas, quai èn rudellas da differentas colurs, sgolan different. Ils ins guliv si, ils auters si ad aut, anc auters en ina curva bassa. La sfida è da tutgar uschè bleras columbas sco pussaivel. La dumengia saira han tut ils partecipants e tut las partecipantas tratg sin totalmain 200 columbas.
-
Bild 1 von 10. Per questas schibas vai, schibas da 9-11 centimeters diameter en differentas colurs. Las uschenumnadas columbas. Bildquelle: RTR.
-
Bild 2 von 10. Avant ch'ils tregants pon cumenzar a sajettar datti tar mintga post ina curta introducziun per l'entira gruppa. Bildquelle: RTR.
-
Bild 3 von 10. Columbas vegnan fatgas sgular per ch'ils tregants ponssian sa preparar sin il tun. Bildquelle: RTR.
-
Bild 4 von 10. E lura vai liber – per Claudio Caprez. Bildquelle: RTR.
-
Bild 5 von 10. Ed era per Romano Vassella. Bildquelle: RTR.
-
Bild 6 von 10. Era da la partida è l'anteriur skiunz dal Principadi da Liechtenstein, Marco Büchel. Bildquelle: RTR.
-
Bild 7 von 10. Cun 18 onns è el in dals pli giuvens partecipants, Jon Andri Guler. Bildquelle: RTR.
-
Bild 8 von 10. Sera Wyttenbach è ina da tschintg dunnas ch'èn sa participadas al champiunadi svizzer a Zernez. Ella è ida a la partenza sco defensura dal titel. Bildquelle: RTR.
-
Bild 9 von 10. Guolf Denoth ha organisà il champiunadi svizzer cun il Club tir a svoul da Zernez. Bildquelle: RTR.
-
Bild 10 von 10. Betg a la curta vegn dasper l'aspect sportiv l'aspect da la cumpagnia. Avant e suenter il tir vegn discutà e ris. Bildquelle: RTR.
Premiera a Zernez
Il champiunadi svizzer ha giu lieu per l'emprima giada a Zernez. Il Club tir a svoul Zernez saja vegnì dumandà, declera Guolf Denoth, co-organisatur dal champiunadi svizzer. Ins haja vulì manar tras la concurrenza ina giada en in auter lieu e Zernez, cun il stand da tir da chatscha, saja stà predestinà per ina tala concurrenza. Il lieu – amez il guaud cun vista sin las muntognas e l'En – è era vegnì ludà fitg da blers partecipants da la Bassa. Ina sceneria talmain bella saja rara, han blers ditg envers RTR.
Il parcours da chatscha hajan spezialists fabritgà, declera Guolf Denoth vinavant. Tar mintga post sgolan las culombas or da differentas maschinas e cun quai en differentas direcziuns. Tratg vegn cun flintas e ballinas.
Blers chatschaders ed intgins auters
Blers dals radund 70 partecipants èn chatschaders, var 80%. Il rest èn tregantas e tregants da sport u era tregantas e tregants che tiran mo sin culombas. Il sport haja si'atgna fascinaziun, èn tuts daperina. La sfida saja da la vart sportiva – l'effet in super trenament per la chatscha.