Las pendicularas da Samignun pondereschan da pretender in certificat per la stagiun d’enviern. Ins saja bunamain sfurzà d'introducir in obligatori da certificat da corona, di il directur da las pendicularas Mario Jenal. In terz dal territori da skis sa chattia da la vart svizra, dus terzs da la vart austriaca. I dovria ina soluziun che valia per l’entir territori, di il directur.
Ils skiunzs hajan era tscherts avantatgs tras l’obligatori. Els stoppian mussar il certificat be ina giada cun entrar en il territori e suenter possian els ir en ustarias e sa muventar libramain. Samignun fiss il segund territori da skis grischun – ch’introducescha il certificat per la proxima stagiun d’enviern. Il territori Fideriser Heuberge aveva gia annunzià l’avust in obligatori da certificat.
