SunIce a San Murezzan - Il festival SunIce è pli u main pront per tut las eventualitads

Loris Moser è il CEO dal festival da musica electronica SunIce sur San Murezzan. En il fratemp organisescha el ensemen cun ses team il festival per la quarta giada. L’organisaziun saja vegnida en quest temp pli automatisada. Uschia saja era sia lavur vegnida pli schluccada.

La situaziun finanziala è naira

Tenor Loris Moser saja l’onn passà stà l'emprim onn ch'il festival haja scrit cifras nairas.

Era quest onn spetga l’organisaziun tranter 22’000 e 24’000 entradas durant ils quatter dis da festival. La maioritad dals visitaders e las visitadras han cumprà bigliets per trais fin quatter dis. Ils dis pli ferms dal festival, venderdi e sonda, sajan vendids ora. Quai sajan bundant 6’000 giasts per di, di Loris Moser. Uschia spetga l’organisaziun era quest onn cifras nairas.

Sfidas organisatoricas

Causa il campiunadi mundial da freestyle a San Murezzan è il festival vegnì spustà per duas emnas. Damai che omaduas occurrenzas han lieu a Salastrains en il territori da skis Corviglia sur San Murezzan, saja il temp per installar l’infrastructura quest onn pli stretg. Las ultimas ediziuns hajan els duvrà trais emnas per las lavurs dad eriger il festival. Per quest onn haja il team però be gì duas emnas peda.

Or da l'archiv:

Pasca sco ristg u schanza?

Il festival è quest onn durant ils dis da Pasca. Malgrà che l’organisaziun ha stuì desister da ses termin usità pervia dals campiunadis mundials da freestyle, sajan ils permiss uffizials vegnids fatgs speditiv, uschia che questa causa na haja betg custà bler temp. Ils organisaturs na teman betg che la glieud na vegniss betg pervi da la Pasca. Cuntrari, damai ch'ils visitaders e las visitadras na stoppian betg prender liber il venderdi ed il glindesdi, saja la vendita da bigliets creschida per 20%, uschia la presumziun da Loris Moser.     

Impressiuns dal erriger dal SunIce Festival