Ils responsabels dal maraton da skis engiadinais èn amez l’organisaziun da la 52avla ediziun. Suenter ina pausa sfurzada da dus onns pervia la pandemia, è Menduri Kasper, il directur da buna speranza da puspè pudair manar tras la cursa populara da passlung.
Corona è en noss chaus. Però nus ans faschessan vegnir mez nars sche nus studegiassan tut il: «di tge fissi sche». Nus planisain nossas cursas sco sch’i fiss in onn normal.
Nov village e nov traject
A la 52avla ediziun dal Maraton da skis engiadinais spetgan differentas premieras. Uschia na fa betg be il village midada da San Murezzan a Puntraschigna, quai ch'era gia planisà per il 2020, er il traject vegn adattà. A Puntraschigna, suenter l’arriv dal mez maraton datti numnadamain ina nova punt che traversa l’aua Roseg e tranter Punt Muragl e Schlarigna datti dus sutpassadis pli lartgs. Tenor Menduri Kasper duain tras quai vegnir diminuidas las colonnas ed uschia il temp da spetga durant la cursa.
Las trais vischnancas Puntraschigna, Schlarigna e Samedan han investì radund dus milliuns francs per questas adattaziuns. Entant ch’il traject fiss cun avunda naiv numnadamain pront per la cursa mez mars, è la speranza davos las culissas gronda, che la pandemia na fa betg in ulteriur stritg tras il quint.
