Dapi in onn e mez èn las vischnancas da Segl, Silvaplauna e San Murezzan vid examinar las schanzas, sfidas e pussaivladads d’ina collavuraziun pli stretga tranter las trais vischnancas. Sco Barbara Aeschbacher, la presidenta communala da Segl, ha ditg envers RTR han ins elavurà differents scenaris d’ina collavuraziun intercommunala fin tar ina fusiun. Ils resultats duain vegnir preschentads ad in’infurmaziun publica il prim da december.
Pass per pass vers ina fusiun?
Che las vischnancas dals lais han lantschà la discussiun fetschia plaschair al president da la regiun Malögia, Andrea Gilli. Tenor el datti oz 66 champs nua che las vischnancas da l’Engiadin’Ota collavuran. Ch’i vegnian uss examinadas collavuraziuns er be da singulas vischnancas saja la gista via. Per ina fusiun cumpletta da l’Engiadin’Ota na saja il pievel numnadamain betg pront. Tuttina saja impurtant che las vischnancas sa mettan ensemen e dattan uschia l’impuls per ina discussiun averta.