Opera Engiadina preschenta quest onn la cumedia musicala «Gianni Schicchi» da Giacomo Puccini. Quella è vegnida adattada cun ina scena avant dretgira «il tribunel», cun musica da Robert Grossmann ed il text e la reschia da Manfred Ferrari.
Culpabel u betg ?
L’opera «Gianni Schicchi» sa basa sin la Cumedia divina da Dante, en il center stat ina ierta. Empè da Firenze dal 1299, è l’inscenaziun da l’Opera Engiadina situada en la Val Puschlav. En il toc vai per Gianni Schicchi, in um lavà cun tut las auas. El sa dat ora sco Buoso Donati e falsifitgescha ses testament a sia atgna favur. Cun ina scena avant tribunal, han Robert Grossmann e Manfred Ferrari cumplettà l’opera, cun text rumantsch e tudestg, ch’il actur Samedrin Lorenzo Polin ha surpiglià.
En occasiun da l’onn da giubileum realisescha Opera Engiadina quest onn sia pli gronda producziun cun 12 solistas e solists, in orchester ed in budget da radund 200’000 francs. Per l’intendant e dirigent da l’opera, Claudio Danuser, saja fitg impurtant d’integrar mintgamai er la lingua e la cultura rumantscha en il program dad Opera Engiadina. Uschia saja prevesida l’onn proxim in’opera engiadinaisa, cun l’istorgia da l’enconuschent «Uorsin».