L’Opera Engiadina è la successura da la Societad Opera San Murezzan e dal opera club. Dapi il 2020 datti l’Opera Engiadina. Ed er questa onn porscha la societad in program multifar enturn il tema opera en l’entira Engiadina e las vals dal sid.
En il center dal program da la societad da questa stad è la versiun rumantscha da l’opera da duas persunas «Las secretezzas da Susanna». Ina opera dad Ermanno Wolf-Ferrari, translatada per rumantsch da la Lia Rumantscha.
Sara-Bigna Janett e Flurin Caduff en las rollas da Susanna e Gil
I n'è betg l’emprima giada che Sara-Bigna Janett da Chamues-ch e Flurin Caduff da Danis stattan sin la medema tribuna. Gia en autras producziuns han la sopranista ed il bass-bariton gia collavurà. Per l’emprima giada dentant sut la batgetta da l’Opera Engiadina e ses intendant Claudio Danuser. Sara-Bigna Janett gioga e chanta la rolla da Susanna, Flurin Caduff la rolla da ses consort Gil.
I va per schigliusia e conciliaziun
En l’opera «Las secretezzas da Susanna» fima Susanna a la zuppada. En la versiun rumantscha vegn anc vitiers ch’ella ama il café. Quai ha da far cun il fatg che la brassaria da café Badilatti da Zuoz festivescha quest onn ses giubileum da 111 onns. Pervia da quai ha Café Badilatti surpiglià il patrunadi da l’opera, ed il patrun Daniel Badilatti gioga gist sez la rolla dal butler Sante. Gil, l’um da Susanna savura sa chapescha il fim e la savur dal café. El craja dentant che sia dunna na fimia betg e na baivia café betg – e suppona ch’ella ha in'affera. Adina puspè fa el perquai scenas a sia dunna. Uschia va quai durant l’entira opera vi e nà. A la fin dentant sa sclerescha tut.