In biro extern analisescha per la vischnanca las structuras communalas. Tenor la presidenta communala Aita Zanetti èsi ura e temp da laschar analisar suenter 10 onns fusiun.
Da gliez temp han ins simplamain cumenzà a lavurar. Ussa ston ins avair ina lingia ed in agir cuminaivel per che tuts sa sentian bain.
Il persunal – il tema central
Oravant tut la cuntentezza e las cumpetenzas dal persunal stattan en il center. Cun differentas collavuraturas e collavuraturs cun ina posiziun clav hajan ins gia fatg intervistas. Per ina vischnanca datti problems da chattar persunal qualifitgà, di la presidenta Zanetti. Perquai saja tant pli impurtant dad analisar tut las furmas e structuras da lavur.
Ma natiralmain vul'ins era analisar l’effizienza da la lavur en ils differents secturs communals, sco per exempel en l’administraziun communala sezza. Sco proxim vul'ins realisar ina sort «roadmap» per decider, co proseguir e realisar eventualas adattaziuns e midaments.
Fusiun da lezzas uras pli clera che la vopna
La fusiun per il 2015 han las vischnancas decidì cler cun stgars 80% da las vuschs intragliauter. In resultat talmain cler, che tant las vischnancas sco era ils mainaprojects han festivà, sco quai ch'il Telesguard ha rapportà.
Mo piz a cup ha la populaziun però decidì pertutgant la vopna. Ina solisuletta vusch ha decidì da salvar la vopna existenta cun il bigl da Scuol. Per salvar la vopna tradiziunala han votà 546 votantas e votants, encunter èn stads 545. La vopna amplifitgada cun sis stailas blauas – ina per mintga fracziun – fiss stà la versiun preferida, sche la populaziun avess vulì midar.
Ed il svilup dal rumantsch en la vischnanca da Scuol para paradox. Schegea che mo radund la mesadad da la populaziun da Scuol discurra anc rumantsch, èsi lev dapli persunas che discurran rumantsch ch'anc avant passa 150 onns. Quai tras la creschientscha da la populaziun.
