La scola industriala a Samedan ha pers ils davos onns bunamain la mesadad dals scolars e radund tschintg mastergns. Aifer quatter mais han ins però chatta ina schliaziun per 10 emprendistas ed emprendists che vulan emprender lur professiun da siemi.
En furma da bloc durant ils mais da stagiun bassa dastgan els absolver la scolaziun en la scola a Samedan enstagl da far il viadi ina giada l’emna a Weggis en il chantun Lucerna.
Spargnar temp e raps
Dad ina vart spargnan las emprendistas ed emprendists il lung viadi d'ir mintga emna enfin a Weggis ed enavos. Da l’autra vart restan els uschia pli ditg en ils affars sco ustarias e cuschinas dals hotels, oravant tut durant la stagiun auta. Era finanzialmain n'era la scolaziun a Weggis betg interessada da manar enavant questa scolaziun. La scola a Samedan porscha tut l’infrastructura basegnaivla per manar tras la scolaziun per las futuras cuschinunzas e cuschinunz da tut la Svizra.
Differentas instituziuns, sco la Gastro Grischun, Hotellerie Suisse Grischun ensemen cun la fundaziun per la promoziun da mastergns Engiadina han chattà ina schliaziun en collavuraziun cun la scola industriala e cun l'Uffizi per la furmaziun professiunala dal chantun Grischun. Suenter mo quatter mais da preparaziun han las emprendistas ed emprendists ussa la pussaivladad da restar en Engiadina.
