L’onn passà fiss stada l’idea da pudair cumenzar a planisar il nov edifizi da la scola industriala a Samedan. Tenor quest plan avess stuì esser pront il nov stabilimaint a partir da l’onn da scola 2026/2027.
Pli paucs scolars, pli pitschen il nov edifizi da scola
Uss è tut auter. Per bajegiar in stabiliment ch'ha avunda stanzas da scola, er per crescher anc en l’avegnir, ha la scola mmemia paucs emprendists ed emprendistas. Var 150 giarsuns e giarsunas van a scola a Samedan. Ils ultims onns è il dumber d'emprendists ed emprendistas sa diminuì cuntinuadamain. Da chattar dapli giarsuns e giarsunas duai esser en il focus, di il rectur da la scola industriala Gian Carlo Simonelli. Er saja la scola vidlonder da porscher curs da bloc per differents mastergns per emplenir las stanzas da scola.
La balla è tar la vischnanca da Samedan
Ils giarsuns e las giarsunas che van a scola a Samedan èn da tut Engiadina, da la Val Bregaglia, la Val Poschiavo, la Val Müstair e da Samignun. La vischnanca purtadra da la scola industriala è pero be la vischnanca da Samedan. Ella stuess surpigliar ils custs ensemen cun il chantun. Tenor il president communal da Samedan Gian Peter Niggli è la vischnanca en discussiun cun la regiun Malögia per tschertgar soluziuns e per engrondir il circul da purtaders. Il discurs è pero dentant en in stadi inizial.
Center da scolaziun per l’Engiadin’Ota
En la regiun Malögia vegn actualmain elavurà er in plan per metter ensemen il stgalim aut. En discussiun sco lieu da scola è er Samedan. Tenor Gian Peter Niggli vul la vischnanca spetgar giu ils resultats da quest project, per betg investir raps uss en novas localitads per la scola industriala e davostiers stuair prender per mauns anc ina giada raps per la medema chaussa.
