Il motiv principal che la via vegn sanada en etappas è la finanziaziun. Il chantun sto scumparter las finanzas sin blers plazzals da construcziun che funcziunan parallel, uschia il schef da l'Uffizi da construcziun bassa en Engiadina Bassa, Rafael da Silva.
La via laterala tranter Ardez e Ftan è fitg impurtanta e sto vegnir mantegnida e per part schlargiada, quai oravant tut per il cas ch'i dat incaps sin la via chantunala tranter Ardez e Scuol. Uschia han ins la pussaivladad da sviar e tuttina evitar colonnas u perfin ina serrada da la via principala tras l’Engiadina.
Serrada betg adina enclegentaivla
Per ils automobilists che circuleschan regularmain sin quel traject per ir a lavurar, saja quai da Ftan en direcziun Engiadin’Ota, ma era per tut quels che vegnan a Ftan a lavurar munta la serrada ch’els ston far quint cun radund 10 fin 15 minutas dapli temp per ir a la lavur. L’encletga che la via stoppia vegnir mantegnida è natiralmain avant maun, ma la durada da la serrada mettan diversas persunas en dumonda. RTR è stà sin via ed ha fermà divers automobilists.
Differents han l’impressiun ch'i sa chattian mo paucs lavurers sin il plazzal. Qua sa defenda il schef da l'Uffizi da construcziun bassa, Rafael da Silva. Durant tschertas lavurs n'hajan ins betg da basegn d’avair blers sin via sco per exempel durant il mirar. Durant las lavurs cun maschinas grondas percunter han ins da basegn da pli blers.