Il cussegl communal da San Murezzan è sa decidì durant sia ultima sesida da mesemna ils 26 da zercladur – d'approvar il credit supplementar per l’ospital regiunal. Ils cussegliers e las cusseglieras han tratg la decisiun unanimamain. Però ha il parlament da San Murezzan admonì durant la discussiun ch'ils responsabels da la fundaziun duain metter pais sin la transparenza, surtut sin las finanzas effectivas.
La fundaziun da la sanadad per l’Engiadin’Ota è uss a la balla
Ils documents ch'il cussegl communal ha pretais en sia critica en avrigl , ha la fundaziun entant provedì. Uschia ha il parlament da San Murezzan pudì trair la decisiun. Il cussegl communal vul dar il temp als responsabels e las responsablas dal cussegl da fundaziun, al cussegl d'administraziun ed a la direcziun da l’ospital – per sa reorganisar e sa preparar per l'avegnir.
Tar la sesida l'avrigl ha il parlament da San Murezzan anc refusà d’entrar la dumonda per in credit supplementar per l’ospital regiunal a Samedan. Las infurmaziuns sajan manglusas e quellas ch'els hajan survegnì sajan vegnidas memia tard, èn stadas las reproschas principalas or dal gremi. La necessitad d’in ospital per la regiun saja evidenta, però la maniera co ch'i saja vegnì fatg squitsch haja procurà per disfidanza en la populaziun.
Autocritica manca
Vuschs or dal parlament han er suttastritgà l'avrigl, ch’i na tanschia betg da far simplamain dar in avis general sin la situaziun problematica d'ospitals en Svizra. Ch’il parlament n’è betg entrà en la tractanda na saja però betg da chapir uschia, ch’ins mettia en dumonda la necessitad da l’ospital en la regiun. Ins fetschia er quint ch’il credit vegnia approvà, però pir cura che tut las cifras detagliadas sajan sin maisa, uschia il tenor.
Ir sur ils cudeschs
Il cussegl da fundaziun, il cussegl d'administraziun e la direcziun da l’ospital ha gì temp in mais per preschentar cifras detagliadas davart la situaziun actuala da l’organisaziun, sco er davart ils plans concrets ch’èn instradads cun il process da transfurmaziun.
29,1 milliuns dapli entradas
Il quint annual 2023 da la vischnanca da San Murezzan serra cun in plus da 312'000 francs. Quai suenter amortisaziuns e prefinanziaziuns da 40 milliuns francs. Las entradas han surpassà las prognosas da budget per 29,1 milliuns francs.
D’engraziar sajan quellas surtut a las entradas tras taxas da midada da possess, uschia il president communal Christian Jott Jenny. El ha preschentà il rendaquint al parlament da San Murezzan ch'ha approvà unanimamain il quint annual da la vischnanca. Il quint vegn anc suttamess al referendum facultativ.
Reacziuns da las vischnancas d’Engiadin’Ota
Ils presidents e las presidentas communalas da l’Engiadin’Ota portan vinavant la strategia da l’ospital regiunal a Samedan. Cun quest credit supplementar possian ils responsabels e las responsablas da l’ospital segirar la gestiun da la fatschenta.
