Cun il nov plan da master vul l’hotel Kulm a San Murezzan lantschar ina nov’era en sia lunga istorgia. Sut la batgetta da l’architect da renum mundial Lord Norman Foster duai vegnir realisà in project da sanaziun cun investiziuns da 125 milliuns francs.
Ils meds finanzials duain vegnir generads da l’hotel sez - pia senza sustegn finanzial da la famiglia Niarchos che posseda l’Hotel Kulm. Tar las lavurs duai la substanza istorica dal bajetg vegnir colliada cun architectura moderna ed innovaziun persistenta.
La finamira è da preparar il Grand Hotel per las proximas generaziuns, senza perder sias ragischs.
Tar las innovaziuns architectonicas tutgan in nov areal per l'arrivada ed in restaurant cun terrassa serrada en furma da cuplas da vaider e vista sin il Lai da San Murezzan. Ultra da quai duai la garascha existenta vegnir engrondida.
Nova galaria da butias
Per dar dapli vita a la Via Maistra da San Murezzan prevesa il plan da master da l’Hotel Kulm er ina galaria cun butias lung la via. Tenor Hunkeler na duai betg dar spazi per ulteriuras butias da marcas luxuriusas.
Ils parcadis ch’èn actualmain a l’ur da la via vegnian remplazzads tras plazzas publicas en la garascha sutterrana, di Heinz Hunkeler.
Gia il mars 2025 aveva l’hotel Kulm cumenzà cun emprimas preparativas. Las lavurs da construcziun duain cumenzar principi 2026 suenter las proceduras da permiss. Las dumondas da fabrica vul l’hotel inoltrar il cumenzament da matg. En tut fan ins quint cun in temp da realisaziun da quatter onns.