Il cussegl communal da San Murezzan ha deliberà suenter la segunda lectura il budget surlavurà a maun da la radunanza communala dal december. Quint fa la vischnanca cun ina perdita dad 857'201 francs. Quai causa grondas investiziuns sco per exempel la chasa da scola Grevas che stan davant porta. A guardar sin la planisaziun dals proxims onns vegn il deficit adina pli grond. Sin la planisaziun da finanzas actuala fan ins quint da l'onn 2024 cun ina perdita da stgars 9 milliuns francs.
Nagin augment da taglia
Malgrà quest previs è il cussegl communal sa decis ch'il pe da taglia resta l'onn 2020 tar 60%. Vinavant na datti nagin augment da la taglia sin immobiglias. Quella resta tar 0.5‰.
Buna collavuraziun
Per il president communal en uffizi, Christian Jott Jenny è quai l’emprim budget en carica. Tenor el ha la collavuraziun cun l’uffizi da taglia ed er il schef da finanzas funcziunà fitg bain.
E ch’i dat adina puspè dumondas e discussiuns per chaussas pitschnas, saja mintgatant stentus però er normal.
Igl è normal, ch’il parlament sa focussescha sin detagls pauc relevants. Mintgin ha in atgna opiniun.
Cuntent è Christian Jott Jenny er ch'il pe da taglia n’è betg da vegnì augmentà, almain na per l’onn che vegn. Sch’i vess però dad esser il cas en il futur saja quai cler sia lezia da sa giustifitgar e da mussar a la populaziun pertge ch’i na va betg auter. Sch’ins fetschia quai endretg è Christian Jott Jenny persvas ch'ils da San Murezzan vegnissan ad esser d’accord.
RR actualitad 12:00