En var 50 dis cumenza il campiunadi mundial da freestyle en l’Engiadin’Ota. Da la mitad enfin la fin da mars cumbattan las meglras atletas ed atlets dal mund per 90 medaglias. Per pudair restar liquid durant l'occurrenza, han ils organisaturs dumandà la vischnanca da San Murezzan in credit transitoric, senza tschains, da dus milliuns francs. Tenor il CEO dals campiunadis mundials da freestyle, Milan Derouck, vegnan pajadas ora las contribuziuns da chantun e Confederaziun numnadamain pir suenter l'occurrenza.
Parlament sustegna campiunadi
Il cussegl communal da la vischnanca da San Murezzan ha decis a sia ultima seduta unanimamain da deliberar il credit transitoric. Quai malgrà ch'igl exista il ristg che l'organisaziun na vegn betg da pajar enavos ils raps. Tenor il cusseglier communal Curdin Schmidt saja uss memia tard per discussiuns da principi. L'eveniment stettia davant porta e duai avair lieu sco previs. Milan Derouck beneventa la decisiun positiva e la fiduzia da San Murezzan. Actualmain lavurian ins anc adina plainamain vi da l'aquisiziun da sponsurs per evitar in deficit cun l'occurrenza. Il scenari da budget actual quinta il meglier cas cun in gudogn da 150'000 francs, il worst case prevesa in deficit dad 1,2 milliuns francs. Ils organisaturs dals campiunadis mundials èn però da buna spranza ch'i na vegn betg a quel worst case.
