Daniel Högger vegn a succeder a la testa da la vischnanca da Samignun. Cun 189 vuschs ha el fatg la cursa en il segund scrutini per il presidi da la vischnanca Samignun. En l'emprim scrutini n'aveva el betg candidà, dentant survegnì bleras vuschs sco candidat selvadi.
Suenter quai, e blers discurs cun persunas dal vitg, è el sa decidì da candidar uffizialmain. Ed il resultat cuntentia el. Betg mo pervia da las bleras vuschs, er pervia da l'auta participaziun vi da las elecziuns communalas (radund 60% han sa participà).
Ils proxims pass
Il pli grond project per la vischnanca saja l'engrodiment dal territori da skis cun ina sutgera a Laret. Là sajan ins gia pulit lunsch. Er il tema Euro fatschentia, il turissem da cumpra ed anc bler auter.
Höngger è gia dapi 26 onns en la vischnanca, dapi radund 12 onns commember dal cussegl communal e presidiescha er quel actualmain. Ultra da quai sesa el en il cussegl administrativ da las pendicularas.
Oriundamain vegn el da Grub en il chantun Appenzell Dadora ed ha chattà sia via a Samignun per lavurar sco scolast da skis. Oz lavura el sco manader da gestiun d’in affar da sport.
Högger è elegì sco president communal da Samignun per il temp d’uffizi fin la fin dal 2024. El surpiglia per Carl Jenal. Jenal è mort il mars da quest onn nunspetgadamain en la vegliadetgna da 58 onns.
