La vischnanca ha annunzià che Daniel Högger candidescha uffizialmain sco president da vischnanca. Las elecziuns han lieu ils 16 da fanadur.
Emprim scrutini
Per l'elecziun substitutiva dal presidi communal a Samignun era s'annunzià sulettamain Daniel Schindler sco candidat. Tar l'elecziun da la dumengia ils 18 da zercladur ha però era Daniel Högger ch'è il president dal cussegl communal, fatg in bun resultat. Cun 71 vuschs ha el numnadamain survegnì be trais vuschs pli pauc che Daniel Schindler. Perquai ch’il pli absolut era tar 107 vuschs, dovri il segund scrutini.
Daniel Schindler che viva dapi in onn e mez a Samignun ha confermà ad RTR, ch'el restia tar sia candidatura. Quai aveva el decis tar l'annunzia da sia candidatura. Per el saja quai in basegn da pudair s'engaschar en la vischnanca nua ch'el abita. L'elecziun substitutiva dal presidi communal è necessaria, suenter la mort prematura da Karl Jenal.
