Uss èsi uschenavant. Il center da tgira Promulins a Samedan ha avert sias portas. Suenter trais onns construcziun e cun plazza per 60 seniors e senioras è l’edifizi uss pront.
Trais plauns per la tgira
La sonda passada ha la populaziun da l’Engiadin’Ota pudì ir a guardar las localitads da l’edifizi. Ils resuns dals visitaders e las visitadras eran positivs. Il spazi è grond, ils corridors èn lads ed ils abitants ed abitantas pon sa legrar sin grondas fanestras e blera glisch natirala. Sin trais plauns èn las stanzas spaziusas cun cuschinas e locals communabels. Il plaunterren è per pazients cun demenza. Spartì sin ils auters plauns èn er stanzas per conjugals cun portas che collian dus locals.
Ils seniors e las senioras ch'èn fin uss alloschads en la chasa veglia da tgira en stretga vischinanza dal nov edifizi, possian far midada il cumenzament da fanadur, quai tenor Gian Arard Melcher, president dal cussegl administrativ da la SGO.
Be l'emprima etappa
Dal project entir è quai be l'emprima fasa. Cura ch'ils abitants e las abitantas han fatg midada en las novas chasas da tgira Promulins a Samedan e Du Lac a San Murezzan l'atun, possian ins cumenzar a renovar il vegl tract da tgira a Promulins, di Gian Arard Melcher. L'organisaziun gestiunescha las novas chasas da tgira a Promulins a Samedan ed il Du Lac a San Murezzan. Tut en tut vegnan ils custs per il center da tgira Promulins stimads tranter 50 fin 60 milliuns francs.
