Suenter trais onns da fabrica, avran las duas novas chasas da tgira en Engiadin’Ota bainbaud lur portas. Il center da tgira Du Lac a San Murezzan che las vischnancas da Segl, Silvaplauna e San Murezzan fabritgan ed il Promulins a Samedan da las ulteriuras vischnancas. Quel vegn remplazzà cun la chasa da tgira existenta e las lavurs sa chattan en il spurt final. Numnadamain duain las 60 senioras e seniors, che han passentà il temp da fabrica en in fabricat provisoric, far midada en lur nov da chasa il principi da fanadur. A San Murezzan cuzzan las lavurs anc fin d’atun. L’avertura dal Du Lac è planisada per il principi da november.
Gronda sfida persunal
Tut en tut survegn l’Engiadin’Ota cun las duas novas chasas da tgira var 50 plazzas da tgira dapli. Quai vul dir ch’i dovra er dapli persunal. La tschertga da persunal spezialisà saja ina gronda sfida, uschè Carla Peterelli, la scheffa da persunal da la fundaziun da sanadad d’Engiadin’Ota. Cun differentas campagnas vul ins chattar ils var 30 novs impiegads che la gestiun tschertga.
Far il pass tenor la chomma
Gabriela Busslinger, la directura dals centers d’attempadas ed attempads è da buna speranza per las averturas dals dus centers. Tuttina saja da far il pass tenor la chomma. Per l’avertura dal Du Lac possian ins occupar tenor il stan actual da persunal var 20 letgs. Suenter dependia quant svelt ch’ins dumagna da recrutar persunal per occupar pli e pli tut ils 60 letgs a San Murezzan. Gabriela Busslinger è però persvasa da pudair occupar gia bainbaud suenter las averturas tut ils 120 letgs che l’Engiadin’Ota porscha a partir dal november.
