Cumenzà aveva tut la fin dal 19avel tschientaner, durant il temp aut dals giasts englais. Giasts ch'han empruvà ora da tuttas sorts novs sports. Or dal sport da cresta – simil al skeleton – è naschì il sport da bob. L'emprim cun pender duas schlittas da cresta ina vi da l'autra ed ir giu per la via tranter San Murezzan e Schlarigna. Il 21 da december 1897 è lura vegnì fundà en l'hotel Kulm uffizialmain il Saint Moritz Bobsleigh Club. Il 1904, suenter reclamaziuns da viturins e memia blers accidents sin via, è vegnì construì per l'emprima giada la bobera.
Il club e sias finanzas
Il club da bob da San Murezzan era ditg responsabel per la construcziun e la gestiun da la bobera. Pir durant ils onns 1970 è vegnida fundada la cumissiun da gestiun, finanziada da las vischnancas da San Murezzan e Schlarigna. Quai suenter ch'ils raps eran vegnids stgars ils onns 1960 e ch'ins ha perfin stuì desister in onn sin la construcziun da la bobera. Grazia a l'engaschament finanzial da Gunter Sachs, ch'era sez pilot da bob durant ils onns 1950, datti oz anc il club ed era la bobera. Il 1969 aveva el surpiglià il presidi dal club e l'ha manà enfin l'onn 2011. Lura ha ses figl Rolf surpiglià il presidi fin che Fritz Burkard l'ha remplazzà dal 2019.
Gia adina è il club dentant stà in club cun duas fatschas, la fatscha da di e quella da notg.
Sch'ins va cun bob van tuts tras il medem proceder, la medema tema, las medemas curvas – quai collia. E sch'ins po lura tgirar questas amicizias davent da la serrada enfin tar l'avertura da la bobera è quai ina plivalur enorma.
Quai eran las entschattas ed uschia è quai era anc oz.
-
Bild 1 von 11Legenda: Il protocol da la fundaziun dal club da bob da San Murezzan è expost en la chasa da parkar Serletta. RTR, Riccarda Müller -
Bild 2 von 11Legenda: Il principi na devi anc nagina bobera, ins è partì davent dal hotel Kulm, pli tard ì giu per la via tranter San Murezzan a Schlarigna. RTR, Riccarda Müller
-
Bild 3 von 11Legenda: A partir dal 1904 è vegnida fabritgada la bobera. Nino Bibbia valeva ditg sco «retg da cresta» ed aveva era success sco bobist. RTR, Riccarda Müller
-
Bild 4 von 11Legenda: Pli tard han ils bobs survegnì hubas. RTR, Riccarda Müller
-
Bild 5 von 11Legenda: Cun questas schlittas ha l'aventura da bob cumenzà. Sco cuntrast ina schlitta da cresta pli moderna. RTR, Riccarda Müller
-
Bild 6 von 11Legenda: Questas caricaturas pendevan en il local dal club ed èn ussa en l'archiv dal club da bob. RTR, Riccarda Müller
-
Bild 7 von 11Legenda: Quests pocals dad Erich Schärer ha il club da bob pudì surpigliar dal museum da sport Basilea, suenter che quel era ì concurs dal 2018. RTR, Riccarda Müller
-
Bild 8 von 11Legenda: Cumenzà ha l'archivaziun cun chattar stgatlas plainas cun documenta davart la gestiun e l'istorgia dal club da bob e la bobera. RTR, Riccarda Müller
-
Bild 9 von 11Legenda: Quatter umens pensiunads èn londervi da documentar l'istorgia dal club da bob e la bobera a maun da fotografias, documents e tgiran ina collecziun che crescha. RTR, Riccarda Müller
-
Bild 10 von 11Legenda: En il rom dal giubileum da 125 onns dal club da bob San Murezzan mussa Filip Zuan fotografias dals constructurs da la bobera en la chasa da parkar Serletta a San Murezzan. RTR, Riccarda Müller
-
Bild 11 von 11Legenda: Il fotograf Filip Zuan expona fotografias davart la construcziun manuala ed unica da la bobera RTR, Armon Schlegel
Rimnar las regurdientschas
L'istorgia dals ultims 125 onns tgiran dapi 5 onns commembers dal club da bob en in archiv. Quel era vegnì realisà suenter ch'ins aveva chattà il 2017 a la partenza da la bobera stgatlas plainas cun documenta e vuleva bittar davent quellas. Las stgatlas èn vegnidas salvadas ed il material sa retgatta dapi lura en in local d'archiv en in tschaler da protecziun sut la scola Grevas a San Murezzan. La collecziun è dentant creschida fitg dapi lura, surtut dapi il concurs dal museum da sport a Basilea. Diversas schlittas e bobs vegls ha il club pudì surpigliar, ma era la collecziun dal bobist Erich Schärer. Quel aveva rimnà tut durant sia carriera – artitgels da gasetta, fotografias, buccals ed era sia medaglia d'aur dal champiunadi olimpic 1980 a Lake Placid. Senza dubi è quai in dals objects ils pli prezius en l'archiv.
La finamira saja tenor l'archivar Lorenzo Mevio da fundar en avegnir ina fundaziun. Quella duai lura tgirar l'archiv ed era il museum planisà en l'edifizi nua ch'il nov kino da San Murezzan duai avrir l'onn proxim. In project dal president ed ertavel d'aczias da la Sika, Fritz Burkard.
Il giubileum
Festivà vegn il giubileum cun ina sairada da gala en l'hotel Kulm, la saira dals 21 da december. En la chasa da parcar Serletta è in'exposiziun da fotografias dal fotograf Engiadinais Filip Zuan. Quell'exposiziun mussa 31 maletgs davart l'istorgia da la construcziun da la bobera unica fin cura ch'ella lieua puspè la primavaira. Ed era la biblioteca da documentaziun mussa objects da l'istorgia dal club. Finir finescha il giubileum cun il champiunadi mundial da bob e skeleton inclusiv champiunadi da para-bob e para-skeleton la fin da schaner. Lura cumenza il giubileum da 100 onns da la Federaziun internaziunala da bob e skeleton ch'era vegnida fundada sin basa dals statuts dal club da bob da San Murezzan.
Or da l'archiv