Butias pitschnas han generalmain difficultads da surviver ozendi. Ellas èn sut squitsch tras ils gronds centers da consum e clientella che posta sias cumissiuns adina pli savens online. En cas dal Volg a S-chanf n’è quai betg l’unic problem.
L’armada svizra, cun sia basa dador la vischnanca da S-chanf, era enfin il 2017 ina clienta gronda per il Volg. Tut ils efforts da gudagnar enavos l’armada n’hajan betg gì success, uschè il president communal Riet Campell. L’avegnir da la butia stettia dentant ferm a cor a la vischnanca.
100% vul il vitg mantegnair la butia dal Volg
La possessura da la butia, la societad da consum agricula da l’Engiadin’Ota, curt LKG, e la vischnanca da S-chanf han envidà ad ina sairada d’infurmaziun. L’occurrenza bain frequentada da la populaziun ha mussà che la butia scriva dapi onns cifras cotschnas. Per quest onn vegn fatg quint cun in minus da radund 40’000 francs.
La vischnanca duess gidar
Per ils responsabels e las responsablas da la LKG, è la situaziun da la butia a S-chanf betg da supportar a lunga vista. Els proponan ch’il vitg da S-chanf surpiglia ina part da la perdita. La vischnanca è averta per quai, di il president communal, ma be a curta vista.
Soluziuns permanentas duai uss tschertgar ina gruppa da lavur che vegn furmada ils proxims dis.
