S-chanf - Nov implant da chalur a distanza

La Salzgeber Marangun S-chanf è vid construir ina nova centrala da chalur a distanza. Quai pervi che l’implant existent è daventà memia pitschen per tut ils clients.

Il prim be in experiment

L’idea ch'il patrun e mainagestiun da la Salzgeber Marangun, Joos Simon Salzgeber aveva, era da nizzegiar ils retagls da la producziun da la lainaria e scrinaria interna. Dapi la fin dal 2010 è en funcziun il prim edifizi da l’implant da chalur a distanza.

Creschì pass per pass

Al cumenzament ha el pudì colliar l’edifizi cun sias hallas da lavur ed era la halla da rampignar be gist in pèr meters davent. Successiv è la rait da chalur creschida fin che dal 2016 ha pudì vegnir colligià las primas chasas ed auters edifizis a Zuoz dus kilometers davent. Ozendi èn las lingias da chalur sa derasadas da Zuoz e S-chanf fin tar ils indrizs da l'armada svizra dasper S-chanf.

In nov implant

Uss na basta quest prim implant da chalur betg pli. La producziun ha stuì vegnir engrondida cun il nov edifizi pli ferm ed effizient. Fin uss ha l’edifizi existent be ars zinslas or da resgias e direct da guauds. Cun la nova construcziun è pussaivel era d'arder ziplas or da lain contaminà cun struvas ed auters metals. Uschia na sto il rument da laina betg pli vegnir transportà or dal chantun.    

Impressiuns da la nova e veglia centrala da chalur a distanza