La suprastanza da S-chanf ha decis ch’ella veglia surpigliar ils proxims onns la mesadad dal deficit annual dal Volg. Quel scriva dapi passa set onns cifras cotschnas ed ils gestiunaris han communitgà a l’entschatta da quest onn da betg pli vulair surpigliar questa perdita. Ussa è il futur da la butia amez il cumin almain segirada per in temp, la garanzia da deficit na vul la vischnanca da S-chanf però betg surpiglier a lunga vista.
Sco la vischnanca da S-chanf ha communitgà, hajan ins fatg durant la stad ina retschertga per eruir las opiniuns ed ils basegns areguard la butia dal Volg a S-chanf. Il resultat saja stà cler e net: la clientella mussa gronda cuntentezza cun la purschida ed appreziescha il Volg a S-Chanf. Quai betg be sco butia e posta, mabain era sco lieu d’inscunter.
Betg spetgà auter
Tenor il president communal da S-chanf, Riet Campell, èn sa participadas var 100 persunas a l'enquista. Da quellas eran var 75% indigenas e 25% giasts, turists e proprietaris da segundas abitaziuns. Uschia che oravant tut persunas che fan regularmain cumissiuns en il Volg han prendì il temp da dar part lur opiniuns ed ideas.
S-chanf surpiglia mesadad dal deficit
Suenter la retschertga ha la gruppa da lavur fatg ina proposta a la suprastanza e quella vegn uss realisada. La vischnanca da S-chanf surpiglia durant ils proxims onns la mesadad dal deficit da la filiala da la LKG a S-chanf, cun ina limita da custs da maximalmain 30'000 francs. Questa garanzia na vala dentant betg per adina. Ella duess be gidar a surmuntar la crisa actuala. Plinavant haja la populaziun la pussaivladad da cumprar scrits da participaziun ed uschia sa participar directamain a l'avegnir da la butia.
Il president communal Riet Campel aschunta: «Cun la perspectiva che l’Hotel Scaletta avess d’avrir sias portas datti en il futur er dapli travasch en vischnanca.»
