A Samedan vegnan damaun e venderdi anc ina giada fatg tests da massa da corona. La raschun è ch'il dumber da las persunas a Samedan, ch'è vegnì testà positiv durant l'acziun cun tests da massa da la fin d'emna, surpassa per in bun tant la media. Quai rapporta la Posta Ladina sa referind sin il post da communicaziun dal chantun.
Surtut tar uffants e giuvenils hajan ins constatà in'auta rata da positivitad. Perquai saja da quintar che quels hajan entant er infectà lur conturn cun geniturs e tats e tattas. Il chantun aveva gia annunzià ch'i vegnia a dar tests posteriurs en tschertas regiuns per suvegnir in meglier maletg.
Ils tests gratuits per l'entira populaziun vegnan fatgs gievgia e venderdi en l'arena da Promulins. Quai da la bunura a las 8:00 fin la saira a las 20:00, respectivamain da las 8:00 fin las 17:00.
