La pictura da Samedan, Erica Bivetti, survegn il premi da reconuschientscha da la regiun Malögia 2024. Cun il premi vegn onurà sia lavur creativa che saja da gronda expressivitad. «En ses purtrets ans mussa ella, co ch'il mund pudess esser unì en tut sias colurs e sias variaziuns», scriva la regiun Malögia en ina communicaziun. La gronda energia che la pictura metta en sias ovras saja impressiunanta.
Gia il 2019 ha Erica Bivetti survegnì il premi da cultura da Trogen per persunas cun impediment. Pervia da mal dal dies na pudeva ella betg lavurar en sia professiun ch'ella ha emprendì.
Il premi da reconuschientscha è dotà cun 10'000 francs. L'artista veglia nizzegiar quels raps per elavurar in cudesch illustrà davart sias ovras.
Premi da promoziun per Gianni Tschenett
Il premi da promoziun da la regiun Malögia va al chantautur Gianni Tschenett. El è creschì si a Schlarigna, ha absolvì l'Academia Engiadina ed haja gia sco uffant fatg musica. Ils ultims onns haja el pudì s'etablir sco chantautur e sco chantadur da lead en differentas bands. Sper balladas scrivia el er adina puspè chanzuns sociocriticas.
Actualmain studegia el musica da Rock/Pop a la Scol'auta d'art a Turitg. Ensemen cun RTR ha Gianni Tschenett registrà dus songs rumantschs. Il premi da promoziun è dottà cun 5'000 francs.