La punt Spuondas actuala era vegnida construida l'onn 1973. Ses stadi pretenda ussa ina sanaziun, scriva la regenza grischuna en ina communicaziun. La punt n'accumplescha betg pli las pretensiuns da segirezza en cas d'aua gronda. Per pudair garantir la segirezza duess la punt vegnir auzada. Cunquai che la punt saja corrodada pervia dal sal, pudess ella vegnir reparada mo cun gronda fadia. Perquai vegnia la punt existenta remplazzada tras ina punt nova.
Sper la construcziun da la punt Spuondas ha la regenza approvà il schlargiament da la via Engiadina e per la sanaziun da la via cunter la canera a l'entrada dal vitg da San Murezzan en direcziun da Silvaplauna. Il project cumpiglia in traject da via d'ina lunghezza totala da var 470 meters.
En pli vegnia renovada la surstructura da la via, e l'aua da plievgia e da naiv sco er l'aua da la spunda vegnan inducidas en l'En ordaifer la zona da protecziun da l'aua sutterrana.
