Recurs han conjunctura - Adina dapli projects da construcziun bloccads

Pliras vischnancas rapportan sin dumonda dad RTR ch'i constateschan in trend d'inoltrar adina dapli objecziuns e recurs cunter dumondas da construcziun. Adina dapli projects da fabrica vegnan retardads u impedids tras objecziuns, raquinta la presidenta communala da Scuol Aita Zanetti. La gronda part da questas objecziuns derivian da proprietaris da segundas abitaziuns, observa ella. Savens giaja quai per objecziuns che n'han insumma nagina schanza da survegnir dretg, l’intent principal saja dentant da gudagnar temp e retardar la realisaziun, raquintan era ils responsabels da Puntraschigna e Laax.

Plirs rapportan era da cass nua ch'il dretg da far recurs vegn surduvrà per profitar finanzialmain. Uschia vegnan recurs per part surduvrads sco med da pressiun per survegnir daners u autras chaussas, raquinta il president communal da Laax, Franz Gschwend. Tenor el saja quella strategia in sport fitg lucrativ.

Tenor il manader da l’uffizi da fabrica da Puntraschigna – Gian Reto Marugg – saja simplamain bler memia simpel da far recurs cunter projects da construcziun. Plinavant na custia quai nagut. Da principi saja l'idea da far il process d'objecziun bunmartgà e fitg buna. Uschè n'esi numnadamain betg be pussibel als bainstants da far recurs cunter projects da construcziun, mabain a tuts. La retschertga dad RTR mussa dentant ch'ils blers recurs cun quels che las vischnancas èn confruntadas caschunan blera lavur a lur uffizis e gronds custs al maun public.