Las ultimas emnas è l'ospital regiunal da Samedan adina puspè stà in tema en las medias. Per l'ina la schef-media ginecologia ch'è vegnida dispensada il zercladur. E bunamain in mais suenter, è vegnì communitgà che duas persunas bandunan per immediat il cussegl administrativ da la Fundaziun provediment da sanadad d'Engiadin'Ota, curt SGO, pia l'organisaziun tetgala da tut las partiziuns en il sectur da sanadad.
Da tegnair la survista n'è betg uschè simpel, surtut perquai ch'i dat almain duas differentas posiziuns: quella da l'organisaziun sin basa administrativa ed operativa – e da l'autra vart il persunal, ils passa 500 emploiadas ed emploiads che lavuran sut la SGO. Vulì prender posiziun avant microfon e camera, n'han dentant naginas vulì.
Differenzas tranter ginecologa e direcziun
Quai ch'è dentant segir è ch'i buglia davos las culissas. Quai è vegnì public il zecladur entras ina charta da lecturs en la gasetta. Concret èsi stà ina charta da la schefmedia ginecologia ch'aveva demissiunà sin la fin da november ed è vegnida dispensada per immediat il zercladur, suenter ch'i ha para dà discussiuns internas tranter ella e la direcziun davart nua metter prioritads.
La ginecologa aveva numnadamain cumenzà da fabritgar si ina tecnica speziala per alluntanar myoms – e quai cun success, er sur ils cunfins dal chantun ora. Ed ella avess gugent investì dapli en questa tecnica.
Ma cun sa concentrar sin questas operaziuns, na saja il focus da la ginecologa betg pli stà il provediment da basa e d'urgenza – l'incumbensa principala d'in ospital regiunal che sto esser garantida, uschia la posiziun da la direcziun da l'ospital a Samedan.
Stretgas da persunal
Ils ultims mais hai plinavant dà ina mancanza da persunal en la partiziun da naschientschas perquai che duas hebammas eran crudadas ora, ha ditg Gian Arard Melcher, il vice-president dal cussegl administrativ da la fundaziun. Questa vacanza hajan ins uss dentant puspè pudì evader.
Actualmain ha l'ospital scrit ora trais plazzas en la ginecologia sin sia pagina d'internet e tschertga er anc persunal en la tgira. Per la plazza da la schef-ginecologia sajan ins sin buna via, ha ditg Gian Arard Melcher.
Nova gruppaziun d'interess IG Pro Medico Plus
Perquai che singulas emploiadas ed emploiads actuals ed anteriurs eran malcuntents, surtut en l'ospital a Samedan, è quest onn vegnida fundada la gruppaziun d'interess IG Pro Medico Plus. E quella ha para tramess pliras chartas cun renfatschas. Tenor la Posta Ladina èsi cunzunt ì per la mancanza da persunal qualifitgà ed il squitsch da temp cun sururas.
Iniziantas ed iniziants da questa gruppa sajan stadas las duas medias dispensadas da l'ospital Samedan, pia la schef-ginecologa ed ina segunda persuna che manava ina partiziun en l'ospital regiunal, scriva la Posta Ladina. Quai ch'ins na po oz dentant betg pli verifitgar. La pagina d'internet da la gruppaziun n'è betg pli existenta, uschia ch'ins n'ha nagina adressa per contactar ils responsabels.
Tge di la fundaziun e la direcziun da questas renfatschas?
Tschertas renfatschas sajan segir correctas, di Gian Arard Melcher che maina ad intermin il cussegl administrativ da la fundaziun. Quellas veglian ins er empruvar da schliar. Ma tut las renfatschas na sajan betg correctas. Impurtant saja uss dad avair ina buna communicaziun cun il persunal. Sco Gian Arard Melcher ha ditg, vegnia introducida ina cumissiun da persunal che era gia planisada da ditg. Ultra da quai vegni a dar in post extern nua ch'il persunal possia s'annunziar cun ses quitads.
La direcziun da l'ospital di er ch'ella haja emprovà da contactar la IG Pro Medico Plus per ina mediaziun. Enfin uss senza success.
Tge fa l'Uffizi per sanadad?
Ins saja vidlunder dad examinar sco instanza da reclamaziun tut las renfatschas envers l'Ospital regiunal a Samedan, ma ch'i sa tractia d'ina procedura currenta. Perquai na possia l'uffizi betg dir dapli. Be tant: da questas examinaziuns dettia ils ultims dus onns adina dapli, surtut er en chasas da tgira, uschia Rudolf Leuthold, il manader da l'uffizi envers RTR.
