Cun in onn retard ha l'emprim forum mundial d'etica gì lieu la davosa fin d'emna d'avust a Puntraschigna. En il center è stada la dumonda, co vegnir tar ina nova responsabladad ed ina relaziun che di «Gea» a la vita en relaziun cun nus sez e cun la terra. Quai cun diversas discussiuns, plirs concerts, in «parlament da la vita selvadia» e spassegiadas en la natira.
-
Bild 1 von 9. Davant il center da congress Rondo è tschentada si ina pitschna senda a pes bluts. Bildquelle: RTR, Riccarda Müller.
-
Bild 2 von 9. Per l'emprima discussiun èn prontas maisas cun diversas frasas e craps. Bildquelle: RTR, Riccarda Müller.
-
Bild 3 von 9. L'avertura dal forum mundial d'etica cumenza cun l'arrivada dad asens. Ensemen cun Linard Bardill chantan ils uffants ed ils creschids che mainan ils asens la chanzun I-A. Bildquelle: RTR, Riccarda Müller.
-
Bild 4 von 9. Lura beneventa Linard Bardill ils participants dal forum dador il center da congress Rondo a Puntraschigna. Bildquelle: RTR, Riccarda Müller.
-
Bild 5 von 9. Suenter datti gia l'emprima discussiun. Ils participants èn sa radunads enturn las maisas per sa scuntrar per l'emprima giada. Bildquelle: RTR, Riccarda Müller.
-
Bild 6 von 9. Lura vai sin spassegiadas. Tranter auter sin ina cun chants d'alp. A pes bluts chantan ils participants da questa spassegiada ina emprima melodia d'alp. Bildquelle: RTR, Riccarda Müller.
-
Bild 7 von 9. Durant la spassegiada datti era melodias cun moviments da splattar. Bildquelle: RTR, Riccarda Müller.
-
Bild 8 von 9. Ed era bists vegnan branclads per sentir la forza da la natira. Bildquelle: RTR, Riccarda Müller.
-
Bild 9 von 9. Sco finiziun chanta Cornelia Bruggmann sin la senda da capricorns ina melodia d'alp da la Stussavgia. Bildquelle: RTR, Riccarda Müller.
La soluziun è l'uman
Per il cuniniziant e manader da gestiun, Linard Bardill vai surtut per ina midada dal cumportament da mintgin sez. Da midar il pensar na bastia tenor el numnadamain betg, i giaja per in midament da l'entir esser. Il forum mundial d'etica duai porscher la plattafurma per dar in stumpel ad in tal midament.
Radund 200 persunas, passa 40 firekeepers, 10 commembers dal comité d'organisaziun e stgars 30 voluntarias èn sa participadas a la premiera. Ella duai esser il cumenzament d'in viadi da perscrutaziun che vegn a durar almain 7 onns.