Avant che la petiziun è arrivada tar la vischnanca da Puntraschigna ha ella reagì sin il cuntegn. Ils arguments ch'ils petiziunaris nizzegian per ramassar suttascripziuns na constettian betg, uschia la posiziun a scrit da la vischnanca da Puntraschigna.
In terz u in dieschavel da la surfatscha
Tenor il text da petiziun basegna l’hotel previs sin quest areal in terz da la surfatscha. Plinavant teman ils petiziunaris la perdita da l’attractivitad da questa zona sco lieu da sport e temp liber cun bajegiar in hotel.
La vischnanca ha scrit en la posiziun che l’hotel basegnia sulettamain in dieschavel da la surfatscha, plinavant saja era la vischnanca interessada che questa plazza restia attractiva per giasts ed indigens, perquai saja impurtant da renovar e sanar la plazza al temp d’ozendi.
En il text da la petiziun stettia vinavant che la parcella, en possess da la vischnanca, saja da reservar en avegnir exnum per il diever public. La vischnanca ha sin quai scrit en la posiziun che la parcella saja en possess da la vischnanca burgaisa e betg da la vischnanca.
Dapi che la plazza Roseg è vegnida midada en ina zona d'hotels èn passads en il fratemp 10 onns, tenor ils petiziunaris saja puspè d’abolir questa decisiun. Sin questa zona datti però tenor il Tribunal federal permiss da construcziun confermads, perquai duess questa zona restar en la zona d’hotels, uschia la posiziun da la vischnanca sin quest argument.
Ils 8 d'avrigl 2025 prevesa la vischnanca d’infurmar la populaziun en occasiun dad ina radunanza communala.
Or da l'archiv:
