L'avrigl da l’onn passà ha la radunanza communala da Puntraschigna decis da metter en pe ina fundaziun cun la finamira da preservar e stgaffir spazis d’abitar per indigens. Quest'organisaziun ha num «Fundaziun da Puntraschigna». Uss è la fundaziun sa preschentada al public. Dus cussegliers e duas cusseglieras cumpletteschan il cussegl da la fundaziun. Il plan: gidar finanzialmain projects e persunas che fabritgan, mettan a disposiziun abitaziuns e terren a la fundaziun.
Strategia 2028
La fundaziun planisescha da stgaffir 20 fin 25 abitaziuns cun plazza per 40 fin 50 indigens cun lur Strategia 2028. Questa finamira duai vegnir cuntanschida cun tschintg mesiras:
- Fittar abitaziuns e fittar quellas vinavant pli bunmartgà.
- Cumprar chasas per fittar.
- Sanar chasas ed alura fittar quellas.
- Obtegnair dretgs da construcziun.
- Emprestar meds finanzials a projects d’utilitad publics.
Basegn finanzial
Ils custs sa muntan tenor la fundaziun sin 16 milliuns francs. La mesadad da quests daners duai vegnir d'agens meds che la vischnanca da Puntraschigna duai contribuir – quai era cun agid da donaziuns e legats privats. L’autra mitad duai vegnir da chapital ester, da bancas, cassas da pensiun e da subsidis dal stadi.
Sa tschentar si per la lunga vista
La Fundaziun da Puntraschigna vul esser independenta da la politica, avair reglas cleras, ella duai agir transparent ed ella vul er avair ina gestiun professiunala. Trais dals quatter commembers dal cussegl da fundaziun abitan a Puntraschigna. Sco president fungescha Andreas Flury.
