En l'avegnir duaja la vischnanca vegnir manada cun il model da direcziun. Plinavant duajan mo tschintg – empè da set persunas – seser en la suprastanza communala. Plinavant duajan era las elecziun da la presidenta u dal president communal vegnir spustadas sin il mais zercladur. Quai duess pussibilitar a la persuna elegida da desdir a temp la plazza da lavur. La suprastanza communala duai vegnir elegida durant il mais settember. La constituziun da fin qua prevesa las elecziuns il november – memia tard per desdir plazzas e per organisar in eventual segund scrutini.
La radunanza communala ha percunter refusà la pussaivladad che persunas estras cun permiss da domicil C astgan en l'avegnir tscherner ed eleger. Plinavant duessan midaments da las leschas d'impostas, da fabrica e polizia vegnir suttamessas a l'urna e betg mo a la radunanza communala.
La revisiun totala da la constituziun communala vegn suttamessa a l’urna il settember. Previs èsi d’introducir la constituziun communala a partir dal schaner 2025.
Zona da planisaziun per evitar «lex Candinas»
A la radunanza communala ha la presidenta communala Nora Saratz-Cazin plinavant er infurmà las votantas e votantas en sala, ch'il cumin da Puntraschigna relascha ina zona da planisaziun a partir dal schaner 2025. Quella duai evitar ch'i vegn en vigur l’iniziativa parlamentara che sa basa sin la moziun dal cusseglier naziunal Martin Candinas, quai che reguarda la lescha da segundas abitaziuns.
Questa moziun prevesa ch’ins po – sch'abitaziuns da dretg vegl vegnan sbuvadas e fabritgadas da nov – engrondir il spazi da viver per 30% e stgaffir segundas abitaziuns. Plinavant duai er esser pussaivel da spustar l’object sin la parcella.
Cun relaschar ina zona da planisaziun valia vinavant il dretg da construcziun actual. Auters midaments ed adattaziuns n’èn betg pussaivel. Puntraschigna è vi dal surlavurar la lescha da segundas abitaziuns. Cura ch’ils midamaints da la lescha da segundas abitaziuns da la Confederaziun van precis en vigur n’è betg anc sclerì dal tut, ma previs è che quels vegnan introducids a partir da schaner 2025.
Rendaquint 2023
Puntraschigna ha il 2023 fatg in gudogn da 1,6 milliuns francs. Plinavant ha la radunanza communala consentì il credit supplementar da 563’000 francs a favur da l'ospital Engiadin’Ota ch'ha gì l’onn 2023 in deficit da radund 5 milliuns francs.