Puntraschigna - Giubbini e Hornberger refan l'areal da la staziun

Puntraschigna ha decidì, tgi ch'ha gudagnà la concurrenza publica per ils projects enturn l'areal da la staziun da la Viafier retica. Quai tar dus dals trais projects. Il terz vegn scrit ora anc quest onn.

1. Il biro Giubbini Architekten ETH SIA a Cuira ha gudagnà la concurrenza publica per l'areal enturn la staziun da Puntraschigna ed in nov albiert da giuventetgna visavi la staziun (project A, mellen). Quai cun lur project «Spaniola». Tar il bajetg da la staziun èsi previs da renovar las fanestras, integrar in supermartgà enstagl dal kiosc existent ed era localitads per il biro d'infurmaziun per il turissem. Per il bajetg da recepziun n'è la giuria però betg daltut cuntenta cun la proposta e preferescha per lez il project «Segantini» da dus biros d'architectura da Turitg.
2. Da tschella vart dals binaris dal tren vul la Viafier retica realisar trais chasas d'abitar cun abitaziuns pajablas deditgadas surtut ad indigens (project B, cotschen). Quella concurrenza ha gudagnà il biro Hornberger Architekten SA da Turitg.
3. La vischnanca da Puntraschigna prevesa anc ina segunda etappa cun in center da sport sin l'areal Cuntschett (project C, verd). Lez project vegn però publitgà pir vers la fin da quest onn.

L'areal da la staziun a Puntraschigna saja il plaz principal d'arrivada da la vischnanca, plattafurma per il traffic public, però era per diversas activitads dal temp liber. E tenor in communitgà communabel da la vischnanca, la Viafier retica e la Fundaziun svizra per il turissem social hajan ins sin l'areal da la staziun anc plaz per spazi da viver e bajetgs da fatschenta.