Puntraschigna examinescha il mument lieus pussaivels per realisar implants solars sin il territori da la vischnanca. In project en mira fiss er sin la spunda vis-a-vis la Diavolezza. Durant las retschertgas s'ha cristallisà or, che differents lieus èn il territori da Puntraschigna fissan adattads per realisar implants solars.
Nagins plans concrets
Concret na sa laschia però anc dir insumma nagut, betg davart la grondezza e betg davart ils custs pussaivels d'in nov implant, uschè la presidenta communala Nora Saratz-Cazin.
Sco ella ha declerà, na bastass il temp da realisar in implant per pudair siglir sin l'uschenumnà Solarexpress da la Confederaziun. Actualmain saja Puntraschigna vi da laschar elavurar in studi ensemen cun l'IG Solalpine e la Repower SA, per insumma augmentar las schanzas d'in nov project.
Il studi vegn fatg da l'institut urnais per culturas da las alps. A maun da quel vuless ins er gia sclerir oravant l'opiniun da las organisaziuns d'ambient. Cura ch'ins possia quintar cun resultats pli concrets n'ha Saratz-Cazin anc betg pudì dir.
