Cun la nova «Fundaziun da Puntraschigna» che la radunanza communala ha approvà cun 214:0 vuschs, ha la vischnanca nov in instrument per agir e reagir activamain a reguard dapli spazi d’abitar per indigens. La fundaziun duai avair ina facultad da partenza d’in mez milliun francs.
Iniziativa senza schanza
Uschè cler sco ch'il Gea è stà a favur da la nova «Fundaziun da Puntraschigna», è stà il Na cun 208:43 vuschs a l’iniziativa «Impiegos da Puntraschigna». Quella avess er pretendì dapli emprimas abitaziuns, cun adattar la lescha da segundas abitaziuns. En il cas ch’ina abitaziun da dretg vegl fiss vegnida sanada u renovada, avess almain 1/3 da la surfatscha gì da vegnir definida sco emprima abitaziun.
Cun il Na a quell’iniziativa è la radunanza seguida a la recumandaziun da la suprastanza. Quella aveva tranter auter argumentà da betg vulair s’intermetter quai che pertutga proprietad privata.
Ultra da quai ha la radunanza communala cun 255 votantas e votants approvà il nov contract d’acziunari cun la Engiadina Turissem SA, sco er ina nova lescha da polizia.