La radunanza communala da Puntraschigna ha decis da metter a disposiziun a la suprastanza communala 2 milliuns francs per l'abitar per indigens. Quests daners po la suprastanza duvrar per construir e mantegnair abitaziuns pajablas. En quest connex han ils da Puntraschigna er dà glisch verda per reveder il reglament davart il fond per las construcziuns da la vischnanca. Il fond vegn da nov er duvrà per stgaffir e mantegnair spazi d’abitar pajabel per indigens.
Quai è la preistorgia
Il spazi d’abitar per indigens è in manco a Puntraschigna, la vischnanca è vidlonder da chattar schliaziuns. Il grond conflict, tenor la presidenta communala Nora Saratz-Cazin è la spertadad dal process.
Sche la vischnanca vul offrir per in object en vendita sche sto ella l'emprim dumandar il suveran per il consentiment e lura èsi memia tard.
Plinavant vegnan a savair ils auters offerents quant che la vischnanca vul investir ed uschia na datti nagina schanza da cumprar. Questa problematica duess esser schliada cun il fond.
Cun in fond da dus milliuns francs esser flexibel
A la radunanza ha la suprastanza dumandà il suveran in import da dus milliuns francs. Quels raps duessan star a disposiziun per restar svelt e flexibel sin il martgà d’immobiglias e terren da fabrica.
Avant l’inoltraziun dal HRM2, l’armonisaziun dals rendaquints en il chantun Grischun, aveva Puntraschigna dus fonds. In per promover abitaziuns socialas ed in cun entradas or da la vendita d’abitaziuns e terren communal. Quels radund dus milliuns francs vegan ussa da surpurtads en in nov fond per stgaffir nov spazi d’abitar per indigens.
La radunanza communala è stada ils 3 d'october 2024.
