Per l'avegnir da l'ospital Engiadin'Ota datti dus scenaris: Ina varianta saja da restar independent. Sco segunda varianta vegnia actualmain evaluada ina fusiun pussibla cun l'Ospital chantunal a Cuira. Quai ha communitgà la Fundaziun Provediment da sanadad Engiadin'Ota.
Ils ultims mais hajan ins examinà intensivamain las differentas pussibilitads per l'avegnir da l'ospital Engiadin'Ota. Uss haja il cussegl da fundaziun survegnì in rapport intermediar. L'analisa haja cleramain mussà ils dus scenaris. Sin la fin da l'onn vul il cussegl da fundaziun elavurar tut ils detagls per pudair decider.
Sfidas finanzialas
Blers ospitals en Svizra stattan sut squitsch finanzial. Quai vala er per l'ospital a Samedan. Per l'onn da fatschenta 2023 aveva l'ospital gia dumandà per ulteriurs 5 milliuns francs tar las vischnancas purtadras. Auter che Samedan che decida pir en in'emna en chaussa, han tut las vischnancas approvà il credit supplementar.
