Ils emprims pass èn fatgs per la fundaziun: Gia la primavaira ha la suprastanza communala discutà en ina sesida da clausura co far frunt a la mancanza d'abitaziuns pajablas per la populaziun indigena. Entant è sin maisa ina proposta concreta cun la «Fundaziun Puntraschigna». Quella duai mantegnair e stgaffir spazi d'abitar per persunas indigenas, uschia la presidenta communala da Puntraschigna, Nora Saratz envers RTR .
Sco vischnanca n'avain nus enfin uss nagins instruments per agir en in cas da vendita dad in'immobiglia a Puntraschigna.
La suprastanza communala ha discutà in'emprima versiun dals statuts e da la finanziaziun. La nova fundaziun duai consister da trais fin tschintg commembers ed avair in chapital da partenza da radund in mez milliun francs. Sco che la presidenta communala ha declerà pudess ins er anc duvrar raps da taglia sin la vendita d'immobiglias per la nova fundaziun. Approvar questa fundaziun duai il suveran da Puntraschigna proxima primavaira ad ina radunanza communala.
