L'intent è da crear emprimas abitaziuns pajablas per famiglias cun uffants che absolvan la scola. Perquai han impressaris, mastergnants ed indigens fundà dacurt la «Cooperativa Lagrev» - quai sco alternativa al project preschentà da la vischnanca da Segl. Cun quest pass vulan els evitar ch'ina firma da la Bassa surpiglia la construcziun ed il management da quellas abitaziuns per indigens.
La vischnanca vul numnadamain realisar il project sin las ultimas parcellas da bajegiar en possess communal en il quartier Seglias. L'associaziun sindicala d’abitar e da construcziun GEWOBAG da Turitg ha preschentà l’entschatta da fanadur il project a la populaziun da Segl. Là è dentant sa mussà che la populaziun ha resalvas, surtut vers il fatg ch'ina firma externa e da la Bassa vegn a realisar il project.
Trais pussaivladads stattan a disposiziun
Sco la presidenta communala Barbara Aeschbacher ha declerà ad RTR datti ussa trais pussaivladads:
- la firma GEWOBAG da Turitg
- la varianta indigena cun il num «Cooperativa Lagrev»
- e la pussaivladad che la vischnanca construescha sezza.
Sco proxim pass ston ins uss examinar la legalitad da las variantas e lura infurmar la populaziun. Tenor Barbara Aeschbacher ha quai emprima prioritad. I saja numnadamain impurtant da porscher bainspert abitaziuns per indigens cun uffants cha van a scola.
