Gia oz han inoltrà radund 11 vischnancas en Grischun il princip da transparenza analog a la lescha davart il princip da transparenza dal chantun Grischun. En il Grischun è quella lescha en vigur dapi il prim da november 2016.
Iniziativa
In'iniziativa suttascritta da 420 abitantas ed abitants, inoltrada il zercladur 2021 pretenda da la vischnanca da Scuol da surprender la medema lescha da transparenza analog a quella dal chantun Grischun.
Cuntraproposta da la vischnanca
L’argument principal da la vischnanca è che tar lur varianta dastgan mo abitantas ed abitants da la vischnanca avair invista en actas communalas e betg l'entira populaziun. Plinavant na prevesa la cuntraproposta betg la pussaivladad d’avair invista en documents interns da la cumissiun da gestiun.
Tar il chantun datti in organ elegì che decida tgenins documents che dastgan vegnir preschentads, tar la direcziun far quai.
![La vischnanca da Scuol cun la baselgia](https://www.rtr.ch/static/cms/images/960w/ff3602.jpg)
Collavuraziun tranter iniziants e vischnanca
Tenor infurmaziuns dal president communal han els communitgà cun ils iniziants e tegnì els sin il current areguard las lavurs. Ma tuttina, ussa vegnan preschentadas omadus variantas a la radunanza communala.
L’iniziativa «per l’introducziun dal princip da transparenza» e la cuntraproposta da la suprastanza vegnan preschentadas a chaschun da la radunanza communala dals 4 d'october 2021. La votaziun a l’urna ha lieu a la fin dal mais november.