Las votantas ed ils votants da Segl han la schelta tranter status quo u vent frestg, quai che pertutga il presidi communal. Numnadamain survegn la presidenta communala en uffizi, Barbara Aeschbacher, suenter sia emprima perioda d'uffizi ina cuntracandidata cun Cilgia Giovanoli. Giovanoli è creschida si a Segl ed ha lavurà durant plirs onns en il sectur da turissem e la communicaziun. Per la vischnanca da Segl sa giavischa ella ina cultura da convivenza averta e constructiva. Barbara Aeschbacher è gia sa disada vi da l'uffizi en ils ultims passa dus onns. Ils proxims onns lavurass ella gugent vinavant vi dals projects pendents ch'ella ha pudì elavurar en sia emprima perioda d'uffizi e da pudair cumenzar novs. Ella sa giavischa che Segl resta ina vischnanca unica ed attractiva per viver e lavurar.
Elecziuns er per suprastanza communala
Sper il presidi, elegian las votantas ed ils votants da Segl er la suprastanza communala. Trais sezs èn d'occupar. Per quels candideschan: Michael Tanno, Peter Wäspi e Jeanin Büchi. Ils suprastants en uffizi, Claudio Dietrich, David Huber e Silvano Meuli sa mettan a disposiziun per ina reelecziun.
Las elecziuns communalas han lieu a la radunanza communala dals 15 da settember.