Schlarigna vul sviluppar enavant la vischnanca, per quai ha ella definì ina planisaziun directiva. Ina part da quella pertutga l'areal tranter la staziun da la Viafier retica e la staziun a val da la pendiculara Marguns. Il studi ch'ha elavurà in concept cumplessiv per quest areal vegn preschentà glindesdi saira a la populaziun.
Previs è che la Viafier retica fabritga ina nova staziun ed ina nova infrastructura. Previs è era ina nova chasa da parcar tar la pendiculara Marguns. En pli tschertga la Engiadina San Murezzan Mountains SA investurs per in project da resort sin parcadi actual Pradè. E lura exista anc l'idea dal Cresta Palace da schlargiar l'hotel e la pussaivladad da parcar.
Projects pli e main concrets
Tenor il president communal da Schlarigna, Christian Brantschen, è il project da la Viafier retica fitg concret. Planisà è da realisar la nova staziun davent dal 2024. Il project per in resort tar la pendiculara è era gia concret, là saja la Engiadina San Murezzan Mountains SA en tschertga d'investurs. E l'engrondiment dal Cresta Palace saja per il mument in'idea da project.
Il volumen d'investiziun è anc avert, i sa tracti dentant da plirs milliuns, uschia Brantschen.
Part d'in project per l'entira vischnanca
Il svilup da l'areal tranter la staziun e la pendiculara è ina part d'in project che pertutga l'entira vischnanca. Previs èn ulteriurs projects, sco la renaturalisaziun da l'En, ina zona da scuntrada lung l'actuala via principala, ina chasa da parcar ed in nov center da sport. La realisaziun è previssa pass per pass durant ils proxims onns.
