Finalmain èn las occurrenzas dal maraton da skis engiadinais enavos. Il cumenzament fa la cursa da dunnas che ha lieu proxima dumengia. Sco Menduri Kasper, il directur dal maraton da skis engiadinais, di, saja il plaschair d’organisar suenter quel lung temp puspè cursas da passlung grond.
Ch’ins po puspè far cursas ed occurrenzas ensemen cun blera glieud è fitg impurtant.
Cursa sco usità
Lung temp n’èsi betg stà segir sche ed en tge furma che las cursas da passlung popularas pon avair lieu. D’elavurar tut ils concepts da segirezza cun differentas variantas saja stà ina gronda sfida. Che las reglas da corona èn per gronda part vegnidas schliadas, fetschia vegnir tut pli simpel. La cursa da dunnas po pia avair lieu sco usità.
