Laurin ch'ha uss quatter onns ha in defect genetic fitg rar e dovra ina tgira permanenta. L'impediment da Laurin è tar sia naschientscha stà in schoc per la famiglia da Scuol. Ils geniturs han stuì s'organisar da nov ed èn daventads dependents dad agid.
La mamma, Nadja Holfeld, lavura dus dis l'emna sco fisioterapeuta. Durant quel temp guarda in di il bab da Laurin e l'auter di la madritscha da l'uffant. Ils ulteriurs dis tgira la mamma di e notg ses figl. Mintgatant vegn ella cun tut dentant er a ses cunfins.
La mamma fiss perquai cuntenta, sch'i dess dapli purschidas per dar giu ina giada be per in pèr uras ses figl. Talas purschidas datti bain per uffants che van a scolina ed a scola, per uffants pitschens però mancan quellas.
Tenor Nadja Holfeld fissan pitschens timeouts per tancar energia però necessarias:
Per nus fissi bel, sch'i dess lieus cun persunas scoladas che guardassan mintgatant in mument da Laurin. Schon be in pèr uras l'emna tanschessan.
RR actualitad 06:00