Per las interpresas da construcziun en Engiadina cumenza la stagiun auta. Tenor Christian Florin, il manader dal center da profit da l’Engiadina da la WALO Bertschinger SA, saja la situaziun da lavur quest onn fitg cuntentaivla. Uschia pudessian ins en teoria engaschar anc 20 fin 30 lavurers u lavureras dapli.
Mancanza da giuvnas e giuvens
La gronda sfida è però da chattar avunda persunal. Tenor Christian Florin è oravant tut il problem che giuvnas e giuvens svieschian adina pli savens sin professiuns en il biro. Quai fetschia er vegnir pli difficil da chattar successiuns per lavureras e lavurers ch'èn gia u curt avant la pensiun.
Il pli bel fiss, sche geniturs pruvassan da persvader lur uffants da far in giarsunadi en il sectur da construcziun. Las giuvnas e giuvens taidlan numnadamain ferm sin ils geniturs.
La sfida da chattar giuvnas e giuvens resta tenor Christian Florin er ils proxims onns gronda.