La Sassa Val Müstair - La Dretgira superiura declera runcada dal guaud sco betg legala
La Dretgira superiura dal chantun Grischun ha approvà parzialmain in recurs da duas organisaziuns per la protecziun da l'ambient cunter ina revisiun parziala da la planisaziun locala da la vischnanca Val Müstair. Ultra da quai ha la Dretgira superiura dentant refusà il recurs.
Concret ha la Dretgira superiura decis che la runcada da radund 457 m² guaud per realisar in parcadi per radund 130 autos per la surfabricaziun la Sassa cuntrafetschia a la lescha. Uschia è l'approvaziun da la regenza vegnida abolida.
Ella è plinavant vegnida a la conclusiun ch’il project «La Sassa» haja senz’auter potenzial turistic e saja relevant per la Val Müstair. Plinavant na cunterfetschia il project betg a la lescha da segundas abitaziuns. Questa sentenzia n'ha anc betg ina vigur legala e po vegnir contestada tar il Tribunal federal.
Planisà è in resort da vacanzas
Tar il project la Sassa Val Müstair sa tracti da la realisaziun dad in resort da vacanzas a l'ur da la fracziun Tschierv, planisà dal biro d'architectura Domenig da Cuira. Quest resort vegniss fabritgà gist dasper la staziun da la pendiculara planisada, che manass sin il territori da skis «Minschuns».
Las organisaziuns da la protecziun da l'ambient, tranter quellas la Fundaziun svizra per la protecziun da la cuntrada e Mountain Wilderness, eran s'exprimidas cunter il project, perquai ch'ellas na vesian nagin basegn per in resort da questa grondezza.
Il project la Sassa ha gia ina lunga istorgia
Avrir la boxSerrar la box
Ils 14 da settember 2018 avevan las votantas e votants da la vischnanca da Val Müstair stgaffì las premissas cun approvar ina revisiun parziala da la planisaziun locala.
Ils 5 da november 2019 ha la regenza grischuna approvà la revisiun parziala da la planisaziun locala cun orientaziun al project decidida da la vischnanca Val Müstair.
Sinaquai han las organisaziuns per la protecziun d'ambient fatg recurs tar l'anteriura Dretgira administrativa dal chantun Grischun (oz la Dretgira superiura dal chantun Grischun).
La regenza e la vischnanca Val Müstair han dumandà ch'il recurs vegnia refusà. Els han tranter auter fatg valair che la realisaziun dal project cumplet portia grondas schanzas per il turissem e saja perquai impurtanta per il svilup da la Val Müstair.
Sin proposta da las partidas è la procedura vegnida sistida l'entschatta dal 2020: En ils quater onns suandants è questa sistida alura vegnida prolungada pliras giadas. Il favrer 2024 è la procedura la finala vegnida continuada.
