Ftan è gia adina stà il dachasa da Tina Mendury. En ils onns 40 ha ella vivì per in curt temp a Turitg, uschiglio n'ha ella dentant mai bandunà Ftan sco lieu da viver.
Er cun prest 99 onns viva ella anc persula en ina abitaziun a Ftan Pitschen. Ella survegnia dentant grondius agid da la famiglia. Sia figlia Elsina Collenberg viva gist dasperas e gida tge ch'ella po.
Anc fitta ed interessada
La dunna che ha lavurà durant sia entira vita sco pura è ina dunna plain energia, malgrà ch'ella n'audia betg pli fitg bain. Mintga di legia Tina Mendury las gasettas. Quest onn ha ella perfin legì tut las var 400 paginas dal cudesch da Ftan.
Jau legel mintga di las differentas gasettas per restar ajour.
Plinavant giauda la dunna da 98 onns dad ir mintga di a spass tras il vitg per discurrer cun la glieud. Uschia resta ella en contact cun las abitantas ed ils abitants da Ftan.